— 799 —
begitoe ia berdjalan kaloear dengen dianter oleh Lu Kok Tjaij.
Sigra djoega ini doea orang doerhaka soeda berpisaän satoe sama laen.
Esoknja, bener djoega Ko Teng Tjan teloh dikaloearken kombali dari dalem pendjara dan di hadepken dalem kantoornja Scuw Gie-soe, jang itoe doedoek bikin pepreksaän sama Leng Tjo. Djangan diseboet lagi, begimana ngenes bila orang liat keadaännja Ko Kong di itoe waktoe; ia poenja loeka-loeka jang baroe liwat satoe malem sadja, sedeng daranja poen masi mengetel-ngetel basaken penoetoep badannja, tapi apa maoe dalem keadaan begitoe ia soeda moesti dipaksa lagi boeat mengadep di hadepan hakim. Begimana sakit bagi itoe loeka-loeka, ini poen ada terlaloe soesa boeat ditoetoerken dengen kalam, maka biarlah pembatja soeka imbangin dengen pikiran sendiri.
Aken tetapi, bagi Ko Teng Tjan itoe semoea tiada dirasa. Ia pandang hoekoeman itoe ada sebagi satoe kelatjoeran jang ia bawa dalem pengidoepannja; sedikit djoega ia tiada merasa sakit hati, baek pada jang menita, baek jang soeda mendjalanken itoe hoekoeman padanja. Tjoema tiada loepa ia menjeboet namanja Allah, sama siapa ia pertjajaken seantero njawanja.
Memang djoega, kaloe kita poenja diri ada dilanggar soesa, sama siapa lagi kita moesti mera-
