— 871 —
Soen Nio, kerna ia ada satoe oeroesan jang maoe dikasi taoe tapi masi djaoe ia denger swaranja Hok Tjoen lagi mengomong dan seboet djoega namanja Siotjia, maka ia djadi tjoeriga dan lantas ingin taoe dari halnja jang sedeng dibitjaraken. la djalan pelahan-pelahan mengpet di pinggir tembok dan baroe oendoerken diri, tempo denger Hok Tjoen poenja omongan jang dioetjapken paling blakang.
Sigra djoega The Tjongkoan soeda ketemoeken istrinja dan minta ia tjepet kasi taoe hal itoe pada Bong Loan, agar ini nona siang-siang djaga dirinja djangan sampe kena didjebak oleh itoe tipoe kedji jang maoe diatoer.
Alangka maranja Ko Siotjia koetika Nio Si bri taoe hal itoe. Moekanja djadi berwarna mera, matanja seperti berapi dan alisnja bergerak-gerak. Dengen tjepet ia sentak pedangnja jang tergantoeng di tembok samping pembaringan, sama ini sendjata jang soeda telandjang la lompat kaloear aken boenoe Hok Tjoen dan Lo Keng. Beroentoeng betoel bagi djiwanja itoe doea menoesia kedji, kerna kehendaknja Bong Loan jang begitoe keras dapet ditjega oleh Tjeng Bwe dan Nio Si.
Digandeng pada kiri kanan sama itoe doea boedjang prempoean Bong Loan di bawa masoek poelah ka dalam kamar; itoe doea orang jang memegang badannja soeda djadi tjiproek dengen
