— 886 —
ia masi teroes jakinken peladjarannja jang dipimpin oleh Sinshe Kong Khe, jang mendjadi djoega sobat ajahnja. Pagi pergi dan waktoe sore baroe poelang.
Ada satoe hari, sapoelangnja dari sekola dan selagi afalken peladjarannja di dalem roema, boedaknja jang bernama Tjin Hie masoek mengasi taoe, Tjo Kongtjoe minta bertemoe. Kou Kongtjoe djadi sanget girang, sigra pergi kaloear dan samboet datengnja itoe tetamoe atawa penoeloengnja Ko Teng Tjan, jang pada itoe hari baroe sampe di Djin Ho. Sasoedanja satoe sama lain menanjaken keslametannja, Tjo Kongtjoe sigra toetoerken ka mana ia maoe pergi; begimana di tenga djalan soeda menoeloeng Ko Kong; begimana itoe orang bangsawan mengirimin pesenan dan laen-laen hal bagi jang tiada perloe di toetoerken poela di sini.
Sepandjang denger pencetoernja Tjo Kongtjoe, tiada brentinja Kou Kongtjoe mengela napas, dari mana ada ternjata, jang ini djedjaka toeroet soesa hati dengen itoe bahaja jang menimpa atas dirinja ia poenja bakal mertoea.
„Kapan Hengtiang brangkat ka Laem-Maij dan sampe kapan baroe balik kombali?” begitoe Kou Kongtjoe menanja pada tetamoenja.
„Besok brangkat dan kira-kira stenga boelan baroe ada disini lagi” saoet jang ditanja.
