— 912 —
Dari bermoela sampe abis, Kongtjoe kita jang dengerin satoe persatoe omongannja The Koen, tiada brentinja mengela napas dan soesoetin aer-matanja, satoe tanda sasoeatoe perkataännja itoe pengoeroes ada menjediken hatinja. Kamodian ia kata: „Tjong-koan soeda menjaksiken dengen mata sendiri, keadaẵnkoe bagini tjilaka, hingga blon bisa dipastiken apa nanti bisa idoep lebi lama atawa tiada; tjoba liat ini loeka-loeka di badankoe, inilah jang membikin rasanja tiada bisa tahan. Dan Tjongkoan toeloeng sampeken akoe poenja keadaan dan pengharepan pada Gak-hoe soepaja ia dapet mengetahoei semoeanja.
The Koen oetjapken banjak perkataan dan berdjandji aken perhatiken pesenannja itoe orang moeda. Lebi djaoe ini pengoeroes roema laloe kaloearken tjoepoe-tjoepoenja, kaloearken satoe obat pil, dengen apa Kou Kongtjoe soeda dibikin semboe dan tiada merasa sakit lagi. Itoe orang moeda poedji betoel kamoestadjapannja itoe obat; The Koen soeka kasiken ia lima bidji pil boeat mendjaga diri.
Tatkala itoe matahari soeda naek tinggi. The Koen bangoen berdiri dan kata: „Kongtjoe sekarang senangken sadja hatimoe, kerna akoe kepaksa moesti meninggalken poela pada kau. Akoe harep Toehan jang toenggal nanti melindoeng Kongtjoe poenja keslamatan selama-lamanja."
