— 934 —
„Bilang sadja seroesan apa?“ kata Joe Siotjia mengindjinken Keng Hoa bitjara. Gadis kita lantas bri taoe niatanja dengen lebi doeloe toetoerken hal soedaranja, Kou Kongtjoe, kamoedian baroe dinjataken dan lebi doeloe mengoetjap soekoer, kaloe Eng Lian Siotjia soeka djadi Kokonja poenja istri jang ka doea.
Koetika denger itoe perkataän moekanja Joe Siotjia djadi bersorot mera, tapi itoe semoea boekan bararti ia tiada moefaket. Ia kata: „Akoe ini boleh dibilang prempoean pegoenoengan, hingga brangkali blon tjoekoep kahormatan boeat direndengken sama ade poenja soedara. Tapi kaloe tiada di boeat tjelaän dengen roepakoe jang djelek, serta poen ada bodo, ketjiwa sekali kaloe akoe menampik.”
Mendenger begitoe Keng Hoa diadi girang sekali. Ini doea orang jang kaliatan saling menjinta seperti sama soedara sendiri, lantas beromong omong lagi dan sampe djaoe malem baroe tidoer.
Baeklah kita tinggalken doeloe Keng Hoa Siotjia jang lagi berobat dibawa penilikannja Joe Siotjia sekarang baek kita liat pada Kou Kongtjoe, perkara apa ada terdjadi atas dirinja ini orang moeda:
Pada itoe hari, dengen di‘iringken oleh doea penggawe Tikoan, Ngioe Sam dan Jho Go, orang moeda kita dibawa berlaloe dari Djin Ho dan katanja maoe dianteri kantoornja Tihoe di
