— 955 —
soeda dapet pegang orang poenja leher dan djorokin ka blakang sampe djato.
Di itoe saät jang sanget bagoes Tjo Kongtjoe petjoet koedanja, jang sigra berlari lagi dengen keras ka loear kota, samentara pengawal tadi sampe lama baroe bisa bangoen lagi dengen dapet bendjol di kapala. la toetoep pintoe kota dan kamoedian pergi dari sitoe maoe laporken hal ladi pada Jam Tikoan.
Tiada selang lama doea orang moeda kita melarikan diri, Te Sioepi dengen tentaranja soeda koeroeng gedong Boe Hoei Ong di sapoeternja, sedeng ia sendiri memanggil-manggil seraja minta diboekaken pintoe. The Liang boeroe-boeroe menghamperi dan sablonnja boeka pintoe ia menanja, kaloe orang itoe siapa dan ada oeroes apa.
Te Sioepi bri taoe ia poenja maksoed kedatengan, The Liong laloe boeka pintoe, di ma- na ia liat sakiternja ada banjak orang politie bersendjata. Kagetnja ini pengoeroes roema tiada oesa dibilang lagi, tetapi ia merasa teramat soekoer kerna Kongtjoenja dan In Liong soeda pergi lari.
„Heran sekali-kali! Akoe poenja Kongtjoe soeda setenga boelan pergi Tiam-hio di Lam Haij blon balik kombali, maka tjara bagimana ditoedoe ia boenoe orang politie di Ngo Siong San!” kata The Liang jang trima pesenannja Tjo Kongtjoe
