— 1065 —
Kita orang ada moerid-moerid Hoed dan anoet agama soetji, tjara begimana brani hinaken laen orang dalem hal jang boekan. Tadi kita orang bitjara dengen sabenernja sadja, tapi tiada doega bikin djadi koerang senang dan merasa dihina. Doedoek doeloe kita berdami lebi djaoe; lagi Kou nio belon bersantap, kita tiada nanti idjinken kau pergi dengen peroet kosong!"
„Akoe soeda tiada poenja soeatoe apa lagi, perkara apalah jang maoe di omongin?" kata In Liong jang lantaran dipaksa soeda lantas berdoedoek.
„Seperti djoega kita orang, Kou-nio djoega soeda djadi korbannja itoe pentjoeri doerhaka,” kata Hwe Kong: „Akoe liat kau soeda tiada poenja pakean dan oewang boeat onkost di djalan, maka akoe rasa itoe koeda djoeal sadja dengen harga jang paling moera.”
„Betoel, akoe poen maoe kasi pikiran begitoe!" menjamboeng Soe Kong dengen lantas: „Dari pada moesti djadi kadinginan dan kelaparan, ada lebi baek itoe didjadiken doewit! Dan seringkali orang bilang: ada barang boeat tetalang diri.”
Mendenger begitoe In Liong diam sabentaran, tapi sama sekali tiada mendoesin, kaloe dirinja lagi dibikin sebagi boelan-boelan oleh itoe doea menoesia keparat. Kamoedian dengen mengela napas ia berkata: „Dari sebab kasoesahan dateng mendesek akoe poen moefaket kaloe ilee koeda
