— 656 —
gantoeng sadja sama akoe sendiri poenja kamampoean! Tapi iboe, akoe bersoempa di hadepanmoe, bahoea kaloe akoe tida bisa dapetin Bong Loan boeat pasangan, akoe tida maoe idoep lagi di ini alam!“
Saäbisnja berkata demikian, dengen tindakan gaga itoe lelaki doerhaka lantas berlaloe dari kamar bibinja.
Tapi apa latjoer, oleh kerna ia bitjara dengen swara keras, perkataännja itoe satoe persatoe telah didenger oleh Ong-sie, istrinja Thio Ho, jang itoe waktoe kabetoelan liwat deket kamarnja Soen Nio, hingga ini njonja lantas sampeken itoe perkataän pada Tjheng Bwe, jang sampeken lagi pada nonanja.
Ko Siotjia tida bilang apa-apa, tapi dari senjoemnja, orang bisa bade, jang ini nona ada mengantjem pada itoe lelaki jang koerang adjar. Djoega sadjek ini waktoe, salaennja pagi-sore dateng menanjaken prikawarasan iboe-tirinja, nona Loan ampir tida maoe dateng di pertengahan besar, sedeng sari-sari apabila tida ada kerdjaän apa-apa, senantiasa ia dateng di ini roewangan, boeat temenin iboenja beromong-omong.
Tapi toch sedeng begitoe, masi tida djarang ia berpapasan dengen itoe lelaki kedjil.
Ja, apalah si nona bisa berboeat, salennja melaga melèng kaloe ketemoe moeka pada
