— 1104 —
ada bikin perhoeboengan resia sama sa-orang lelaki jang mendjadi ketjintaännja, kerna kaloe boekan begitoe, apa perloenja orang poelang dalem waktoe itoe, waktoe orang sedeng enak tidoer. Sembari berdjalan Joe Kong sembari berpikir, achir-achir sebab ingin taoe siapa adanja itoe orang moeda maka ia ambil poetoesan — brangkali sadja bisa dapet pinggiran — boeat pergokin itoe perboeatan pada malem jang aken dateng.
Esok malemnja, dengen selipken golok jang tadjem di pinggangnja, dari masi sore Joe Kong soeda menoenggoe di blakang roema, tiada djaoe sama pintoe, di mana kemaren malem itoe doea orang kaloear. Djam doea blas tenga malem soeda liwat, tapi tiada kadengeran gerakan apa-apa, hingga membikin Joe Kong dapet rasa kwatir ini malem itoe orang tiada dateng.
Selagi mendoega doega, koenjoeng-koenjoeng kadengeran swara orang memboeka pintoe, dan seperti terdjadi lagi kamaren malem itoe malem poen demikian djoega. Joe Kong liatin itoe doea orang berdjalan pergi dengen sabar, tapi koetika itoe boedjang prempoean balik kombali dan maoe masoek ka dalem, ia mengandang di depan pintoe dan pegang orang poenja tangan dengen kentjeng.
„Hm, bagoes betoel kau orang poenja per-
