— 1231 —
kali. Kamodian ia menanja poela: „Seandenja fihak moesoe tjoekoep koewat, sedeng kita poenja fihak lema, begimana kau bikin perlawanan?"
„Djikaloe mengadepken, keada'an demikian, sekali-kali tiada boleh di goenaken kakoeatan tenaga, hanja moesti pake daja oepaja," saoet Bong Loan. „Teroetama djadi panglima prang haroes pande meliat gelagat dan mengimbangken salatan; bertemoe moesoe jang tanggoe moesti melawan dengen tipoe aloes, kota-kota moesoe jang dibikin kosong kadang-kadang ada membahajaken bagi orang jang masoek dengen sembarangan. Inilah ada sebrapa perkara jang haroes di perhatiken oleh ponggawa ponggawa prang."
Baginda Sin Tjong kliatan djadi terlebi girang dan laloe prenta Dji Lam Ong seraken Goanswe In pada Bong Loan, sedeng sepasang kembang mas Baginda sendiri tantjep di mana kopianja, berikoet dengen setjawan arak sebagi ia poenja pembrian selamat.
Lebi djaoe Baginda bri idjin boeat ia goenaken gelaran namanja, jaitoe di seboet Lam Pak-Taij Goanswe.
Bong Loan berloetoet kombali dan membilang banjak trima kasi atas Baginda poenja boedi, sasoedanja jang laen-laen pamoeda trima pangkat dengen mengimbangken marika poenja kepandean, Baginda dan orang banjak lantas boebar dari itoe lapangan.
