— 1234 —
laen djalanken peradatan, Bong Loan lantas menanja, dengen maksoed apa Lu Sinsiang prenta datang padanja.
„Sinsiang merasa penoedjoe sekali dengen Goan-swe poenja keada'an,“ kata itoe orang, „maka ia oetoes akoe dateng kemari dan minta Goanswe soeka trima ia poenja perminta'an, boeat menika sama poetrinja.“
Akoe ini sebenernja ada saorang bodo jang berasal dari pegoenoengan, maka akoe kira Sinsiang soeda kliroe liat akoe poenja keada'an jang sabenernja,“ saoet Bong Loan. „Tapi kaloe dengen sebenernja Sinsiang ada mengandoeng itoe niatan jang begitoe baek, soeda tentoe akoe poen tiada brani menampik.“
Itoe orang djadi girang sekali koetika liat perminta'annja di trima, maka sasoedanja beromong-omong poela sabentaran ia lantas berpamitan dan kasi taoe hal itoe pada Lu Kok Tjaij.
Tjeng Bwe koetika denger nonanja trima itoe lamaran hatinja djadi tiada abis mengarti, maka tempo itoe orang soeda pergi ia lantas menegor: „Siotjia, dengen maksoed apa kau trima Lu Kok Tjaij poenja lamaran? Apa dengen berlakoe begitoe sengadja Siotjia maoe dapet tjilaka?“
„Djoestroe kaloe tiada trima ia poenja perminta'an kita poenja diri ada terantjem bahaja, kau mengarti!“ kata Bong Loan, jang sigra me-
