— 1242 —
dan ingin dapet kekwasa'an sebagi. radja. Dari itoe kau djangan heran, kaloe akoe poenja keada'an ada di moesoein pada sekalian kawan sedjabat sendiri.“
―„Boeat Gak-hoe akoe kira tiada perloe takoet dengen marika poenja tjara berdjaja oepaja; gerak-gerakan dalem segala perkara Gak hoe paling pertama jang moesti taoe, maka soekerlah marika bisa sampeken kahendaknja.“
―„Betoel begitoe, tapi tiada oeroeng kita moesti berlakoe ati-ati. Dan lagi akoe kasi mengarti, bila Hian-Saij bisa berlakoe sebagimana jang akoe pesen, ini kabesaran jang sekarang ada dalem akoe poenja tangan, kaloe akoe soeda menoetoep mata, tentoe djoega Baginda aken seraken padamoe.“
Bong Loan beroelang-oelang kasi liat moeka manis dan hatoerken trima kasi, tapi sabenernja ia poenja hati ada sanget gemes. Teroetama koetika ia seboetken namanja ia poenja orang toea dengen gelaran penghianat.
„Oh, Lu Kok Tjaij, Lu Kok Tjaij!“ kata Bong Loan dalem hatinja, „Sasoenggoenja tiada sala kaloe orang soeda, kasi nama setan belongkotan pada kau, kerna sekarang akoe baroe dapet kenjata'an betoel!“
Lebi djaoe gadis kita ingin tjari taoe prikeada'an ajah antara itoe dorna dalem pengidoe-
