— 1253 —
pangkat Goanswe nanti di dapet oleh sala satoe dari kita orang berdoea!" kata Song In.
„Perkara begitoe mana bisa di pastiken lebi doeloe," saoet Boen Pa sambil tertawa. Hiante moesti inget, dalem pertempoeran begitoe, orang gaga jang dateng sanget besar djoemblanja, maka tjara bagimana soeda maoe di pastiken lebi doeloe kita orang jang bakal dapet."
Sasoedanja bitjaraken itoe perkara sakoetika lamanja, ini doea orang telah ambil poetoesan aken toeroet ambil bagian dalem itoe pengoedjian. Song In sigra ketemoeken Sian Wan-gwe dan bertaoeken itoe maksoed, jang mana oleh itoe Wangwe poen tiada di tjega.
„Kapan Hiante maoe brangkat?" mananja Sioe Djin.
„Pengoedjian aken di bikin pada boelan Dji Gwe, soepaja tiada katinggalan, esok djoega akoe moesti brangkat djalan," saoet Song In.
„Kaloe begitoe segala kaperloean moesti di atoer dari sekarang, soepaja esok segala apa soeda tersedia," kata poela Sioe Djin, jang lantas prenta istrinja sediaken apa jang perloe boeat perbekelannja Song In dan Tjo Kongtjoe dalem perdjalanan.
Si Gagoe poen oleh Sioe Djjn roepanja soeda di kasi taoe kaloe Song In bakal pergi ka kota radja, kerna itoe tempo ia poen ambil poetoesan maoe toeroet pergi ka sana. Ia taoe Song In ada
