— 1259 —
Esoknja ditjari lagi, ini sekali marika pergi ka tempat-tempat jang sedikit djaoe, tapi djoega pertjoema sadja, ia orang moesti poelang dengen tiada dapet ketrangan apa-apa.
Begitoe dengen begitoe bebrapa hari telah berlaloe.
Tjo Kongtjoe kaliatan djadi semingkin doeka, Song In boedjoekin padanja dengen berkata: „Hengtiang tentoe taoe, kita poenja brangkat perloenja jaitoe aken toeroet ambil oedjian. Sekarang lantaran tjari itoe koeda jang ilang kita soeda memboeang tempo ampat hari lamanja, hingga akoe kwatir kita orang nanti katinggalan. Maka dari itoe, apa tiada lebi baek beli sadja laen koeda, sedeng itoe jang ilang kita boleh tjari pelahan-pelahan?"
„Oh, tiada bisa, Hiante," saoet Tjo Kongtjoe sembari mengela napas. „Kau taoe, itoe koeda soeda bilang blas taon ada dalem tangankoe, sabegitoe lama ia selaloe bisa menoeloeng padakoe dalem berbagi-bagi oeroesan jang penting. Tempo terbit itoe perboeatan kedji di goenoeng Ngo Siong San, kaloe boekan itoe koeda, soeda tentoe akoe tiada bisa toeloeng Kou Hiante dari kabinasa'an; di Tjiauw Boen Koan ia soeda tendang mati saorang prempoean jang hendak kangkangin akoe poenja harta; paling blakang koetika Ouw-jan Heng doedoekin itoe koeda dan
