— 1292 —
diwan keradja'an tapi akoe taoe, ia, itoe ada pembesar dorna, jang pande bermoeka-moeka, pendjilat dan laen-laen kelakoean boesoek. Oh, penghianat jang doerhaka, kaloe taoe bakal djadi begini roepa, tentoe akoe soeda tiada ambil poesing lagi sama itoe bebrapa bahaja jang aken mengambil djiwamoe!"
Sedeng kata begitoe Boen Pa berbangkit, ia meraba dan pegang gagang pedangnja.
Bong Loan djoega bangoen dari tempat doedoeknja, ia manggoetin kapalanja dan kata; „Apa jang Hengtiang bilang sasoenggoenja ada satoe pengadjaran jang paling baek dari apa seperti jang akoe telah doega. Tapi dengen menjesel akoe moesti terangken, sabegitoe lama akoe ini blon perna berdjoesta, lagi tiada bikin perdjandjian apa-apa seperti apa jang baroe Hengtiang seboetken."
Koetika denger itoe perkata'an Boen Pa djadi kaget sekali, kerna swara itoe boekan swaranja Kou Kongtjoe. la lantas angkat moekanja dan memandang dengen ati-ati orang poenja moeka, di sitoe ia baroe dapet kenjata'an, orang itoe sasoenggoenja boekan In Liong, hanja saorang moeda jang ia tiada kenal sama sekali.
Moekanja Boen Pa di itoe sa'at djadi sanget mera, pengrasahan maloe dan begitoe besar seperti di itoe waktoe, ini ia baroe perna dapetken.
