— 1293 —
„Ma'af..... ma'af Goanswe,” ia kata, lantaran kau poenja nama ada saroepa sadja dengen nama sobatkoe, lagi akoe sendiri koerang begitoe perdata, maka soeda terbit ini kakliroean.............. sembari kata begitoe ia lantas bertindak aken kaloear dari itoe roewangan.
Tapi Bong Loan boeroe-boeroe menjega seraja berkata: „Kakliroean memang sering terdapet oleh sembarangan orang, maka boeat apa sobat merasa maloe; doedoeklah doeloe, akoe ingin bitjara lebi djaoe padamoe."
Boen Pa liat kelakoeannja itoe orang moeda begitoe baek, maka dengen tiada sampe di paksa beroelang-oelang ia poen sigra doedoek kombali.
Samentara itoe Tjeng Bwe bawa doea tjawan thee, satoe tjawan ia taro di hadepan Bong Loan, satoe poela boeat Tjo Kongtjoe. Moekanja itoe pamoeda jang masi blon beroba telah dapet di liat oleh Bong Loan, jang laloe berkata: „Hal baroesan djanganlah di boeat pikiran; sekarang akoe hendak menanja, sedari kita orang berpisa'an di Kang Leng, selama itoe Tjo Heng lindoengken diri di mana?"
„Kenapa Goanswe boleh taoe dan menanja begitoe?" tanja Boen Pa dengen merasa heran.
„Njatalah Tjo Heng ada saorang jang sanget peloepahan?" kata lagi Bong Loan sambil tertawa. „Kita orang berpisahan dari itoe tempo sekarang
