— 1294 —
blon brapa lama, mengapa Tjo Heng soeda tiada inget lagi. Tjoba pandang betoel-betoel, apatah akoe ini boekan Loan Bong Ko?"
„Ja, ja, sekarang akoe inget!', kata Boen Pa sambil manggoet-manggoet. „Sekarang akoe baroe inget pada Loan Heng, itoe penoeloeng jang berboedi!"
Bong Loan tertawa.
Boen Pa lantas berbangkit, ia memberi hormat. Satoe sama laen laloe menjeritaken masing-masing poenja perdjalanan, kamodian Boen Pa berkata: „Djadi sekarang ada mengoendjoek terang, Loan Heng ada lebi beroentoeng, kerna soeda dapetken ini pangkat besar."
„Ja, itoe semoea ada berkahnja Allah!" kata Bong Loan.
„Tapi kenapa Loan Heng tiada pake nama sedjati, hanja goenaken laen orang poenja nama?"
„Itoelah Tjo Heng djangan heran. Kou Kong-tjoe akoe taoe ada kau poenja sobat baek, maka akoe sengadja goenaken itoe nama soepaja orang dateng tjari padanja kamari, dan sekarang djoestroe soeda kedjadian sebagimana jang akoe ada harep."
Tjo Kongtjoe lantas tertawa dan njataken, perboeatan itoe ada satoe perhatian jang haroes di pandang tinggi. Kamodian Bong Loan menanja, sabenernja dengen maksoed apa Boen Pa dateng
