— 1297 —
di itoe waktoe, kerna apa sebab maka orang meliatin padanja sampe begitoe.
„Kenapa ini orang roepanja ada mirip sekali dengen ajahkoe, sedeng potongan badannja sama betoel dengen Song In?" Begitoe achir-achir Bong Loan menanja dalem hatinja.
Sedeng berpikir begitoe hatinja itoe gadis merasa sanget terharoe, kerna ia inget begimana adenja jang satoe-satoenja telah ilang dengen tiada ketaoean di mana adanja.
„Ah, sajang betoel," kata poela ia, „tjoba kaloe Song In ada, nistjaja aken terdapet doea djedjaka jang sepasang dan tjakep roepanja."
Dengen roepa penasaran Bong Loan meliatin kombali. la ampir tiada maoe pertjaja pengliatannja kaloe pemoeda itoe boekannja Song In, kerna roepanja tiada beda sama soedaranja.
„Biarlah ini orang akoe pekerdjaken dalem angkatan prang di sini, atawa kamodian ia boleh toeroet pergi ka Salatan aken bantoe bikin aman keada'an di sana, begitoe ia dapet pikiran. „Nanti kaloe ajahkoe poelang dari boeangan, sekali poen Song In tiada dapet di tjari, tapi ini orang jang roepanja sama tentoe aken djadi penghiboer bagi hatinja itoe orang toea."
Seabisnja kata begitoe ia berpaling pada Boen Pa dan menanja: „Kaloe tiada sala, inilah itoe pamoeda jang Tjo Heng seboetken tadi?"
