— 1299 —
matan boeat bertanding sama Goanswe, dengen segala soeka hati akoe poen meloeloesken.”
Bong Loan denger begitoe djadi sanget girang. la lantas adjak Song In dan Tjo Boen Pa ka roewangan blakang, di mana ada terdapet satoe tempat lega, tjoekoep boeat orang bertaroeng.
Seperti djoega di roewangan jang laen-laen, di sitoe poen ada dipasang banjak penerangan. Dan lagi roepanja itoe tempat ada digoenaken tempat bertanding, kerna ada terdapet banjak alat prang, seperti toembak, golok, Pokiam dan laen-laen perabot sebaginja.
Bong Loan sigra bikin ringkes pakeannja, kamodian ia ambil sebatang toembak dan bri tanda pada Song In aken moelai bersedia.
Itoe pamoeda poen tiada maoe kala gesit, sa- soeda bikin ringkes pakeannja, ia sigra ambil sepasang Ti Tjhio (sikoe-sikoe).
Bong Loan lebi doeloe pasang satoe poekoelan dan silaken Song In menjerang; koetika sendjatanja Song In dateng mamoekoel, dengen sebet Bong Loan kibas sama toembaknja, hingga itoe sepasang Ti Tjhio terpental. Orang doega itoe koetika Song In aken trima serangan heibat, tapi ternjata tiada begitoe, kerna dengen lekas ia soeda bisa poelangken kombali sendjatanja, seraja tangkis toembaknja Bong Loan jang dateng manoesoek begitoe tjepet.
