— 1324 —
Djimpo mengarti keada'an hatinja Soen Nio di itoe waktoe, maka ia lantas berkata: „Perkara jang soeda-soeda djangan di'inget lagi; ini waktoe kita perloe dapet tempat baek boeat melindoengken diri, maka kaloe inget perkara jang di rasa sakit di hati, diri sendiri bisa djadi telantar."
„Tapi begimana akoe ada itoe moeka bertemoe pada itoe prempoean djoedes," kata Soen Nio, „kau toch taoe sendiri, ia senantiasa sanget bentji padakoe, maka kaloe sekarang akoe pergi dan minta menoempang di roemanja, nistjaja ia nanti bikin dirikoe sebagi menoesia jang tiada ada harganja!"
„Oh, itoelah tiada bisa djadi, njonja," kata Djimpo jang kepaksa djadi tertawa, doeloe laen sekarang laen; toeroet akoe poenja pikiran, tiada nanti ada manoesia jang begitoe kedjem liatin sesamanja mendapet tjilaka dengen tiada membri pertoeloengan satoe apa, teristimewa Hoedjin dan Bauw Si satoe sama laen terkena familie."
Soen Nio pikirin itoe pembitjara'an sakoetika jamanja, sebab pikir tiada ada laen djalan jang di rasai paling baek, maka achir achir ia meloeloesken djoega.
Kabetoelan itoe tempo ada liwat bebrapa praoe penoeloeng jang sengadja diadaken menoeroet prentanja pembesar negri di sana, begitoelah dengen pertoeloengan itoe orang-orang praoe, Soen
