— 1338 —
sa'at ia bisa madjoeken serang serangan jang berbahaja.
Achir-achir itoe tiga panglima negri djadi kateter satoe persatoe, lantas moendoer, kerna tiada sanggoep aken bertanding lebi lama sama Hoei Liong jang gaga perkasa.
Berbareng dengen itoe, rahajat begal dengen bersoerak-soerak madjoe menjerang pada barisan negri.
Hoei Liong lantaran itoe kemenangan kaliatan djadi semingkin galak dan sombong. Ia tertawa bergelak-gelak seraja berkata: „Kaloe masing- masing tjoema baroe poenja kepandean begitoe sadja, begimana soeda berlakoe begitoe brani mati dateng kemari!“
Tjo Goanswe tiada bisa tahan meliat kelakoeannja itoe panglima begal, maka ia lantas madjoeken koedanja seraja berkata: „Hoei Liong! Brangkali mengira tjoema diri sendiri sadja ada poenja kegaga'an, tapi djangan sala mengarti, akoe, Tjo Goanswe, nanti panggal kau poenja batang leher!“
„Kau djoega brangkali tiada beda dengen itoe bebrapa panglima jang soeda djadi akoe poenja petjoendang!“ kata Hoei Liong dengen roepa menghina. „Hoei Liong di goenoeng Yauw Taij namanja soeda terkenal, maka belon tentoe nanti moendoer bila baroe digertak begitoe sadja!“
