— 1350 —
maka kita orang moesti berlakoe ati-ati, djangan sampe kena di tipoe olehnja."
Semoea orang bilang baek. Sampe djaoe malem baroe itoe pesta perdjamoean di toetoep.
Taij-Ong Thian Poet Pa koetika poelang ka pasanggrahannja dan dapet taoe soedara-soedaranja telah binasa di tangan moesoe hatinja djadi sanget ketakoetan; terlebi lagi koetika dapet ketrangan, bahoea tentara moesoe selaennja berdjoembla besar, djoega ada di pimpin oleh banjak ponggawa prang jang gaga dan pande.
Sigra ia panggil Pa Koensoe, sama siapa ia bermoefaketan begimana moesti berlakoe di itoe waktoe.
„Moesoe soeda boenoe kita poenja bebrapa soedara jang paling ditjinta, laen dari itoe ia soeda binasaken ampir tiga bagian dari djoemblanja kita poenja rahajat, maka sekarang akoe hendak menanja, begimana kita haroes berboeat, soepaja itoe sakit hati bisa dapet dibales?”
Orang jang ditanja mengela napas, ia kaliatan seperti soeda poetoes harepan.
„Sasoenggoenja hal ini membikin akoe sendiri merasa sanget soeker, ka sana sini serba sala," kata itoe Koensoe, „kita poenja kadoedoekan ini waktoe ada sanget berbahaja; balatentara soeda djadi koerang, alat sendjata tiada tjoekoep, tentoe soesa sekali aken bisa menangkis serangan moesoe jang begitoe besar djoemblanja.”
