— 1351 —
Thian Poet Pa pandang moekanja itoe Koensoe dengen roepa terharoe. Ia roepanja dapet doega apa jang ada dipikirin dalem hatinja Pa Tauw, maka itoe waktoe ia lantas menanja: Koensoe kaliatan sebagi orang soeda poetoes pengharepan, apa betoel begitoe?”
Kombali itoe orang pande mengela napas. la kata: „Pikirankoe memang begitoe; sedari bebrapa hari jang laloe akoe soeda pikir, kita poenja keada'an jang begitoe iipis biar begimana djoega tentoe tiada bisa angkat diri sendiri jang soeda kadjeblos ka dalem djoerang jang dalem. Kita melawan pertjoema, maoe tinggal teroes mendjaga ini tempat, tapi kita ada kakoerangan ramsoem, moesoe koeroeng ini goenoeng bebrapa hari sadja, nistjaja kita aken djadi mati kelaparan.”
—„Abis sekarang begimana Koensoe poenja pikiran?”
—„Akoe pikir baek berlaloe sadja ka laen tempat, di mana kita boleh berpikir poela atawa toentoet laen pengidoepan jang lebi baek.”
Thian Poet Pa berdiam sabentaran selakoe orang berpikir, tapi kamodian ia berkata: „Kaloe Koensoe merasa soeda poetoes pengharepan, akoe poen tiada bisa berboeat laen dari pada menoeroet sadja. Tjoema kaloe kita melariken diri moesoe tentoe mengedjer, dengen begitoe kita bisa dapet tjilaka djoega."
