— 1355 —
Kamodian itoe Generaal adjak barisannja poelang ka pasanggrahannja, di mana laloe disiarken soerat salebaran pada sekalian afdeeling dan kota-kota, minta pembesar-pembesar dari itoe bebrapa tempat taro pendjaga'an penting, aken tangkep itoe kawanan brandal jang telah melariken diri.
⁂
Itoe soerat salembaran sigra djoega telah sampe dikoeliling tempat, jang mana satoe-satoe pembesar djadi kalang kaboet bikin pendjaga'an di tempatnja. Djoega Wie Wan Ong Kioe Tjianswe di kota Tjoe Kat Shia telah trima itoe soerat, maka pada itoe hari ini pembesar sigra koempoelken sekalian panglima prangnja.
Lebi doeloe ia oendjoek itoe soerat maloematnja Tjo Ganswe pada itoe sekalian panglima, kamodian ia lantas berkata: „Menoeroet atoeran jang soeda ditetepken oleh pamerenta agoeng, memang kita ada menanggoeng kewadjiban besar aken membantoe pada sasoeatoe ponggawa prang negri jang dateng dalem kita poenja bilangan dan bantoe apa jang perloe padanja. Tapi sekarang kau liat sendiri, akoe ini soeda beroesia tinggi, djangan poeia boeat madjoe di medan prang, boeat oeroesan di dalem kota sadja kerep kali akoe moesti mewakilken sala satoe dari angkau sekalian, maka boeat oeroesan ini akoe tiada
