— 1376 —
jang tiada beroentoeng, kerna tiada lama ajah moesti lakoeken pakerdja'an lagi di kota Gan Boen Koan, serta kamodian ajah mendapet tjilaka diboeang ka Leng Lam. Koetika ajahkoe pergi ka pemboeangan, akoe ada di dalem sakit jang berat sekali.
Moelai dari itoe waktoe akoe telah menampak berbagi-bagi kasoekeran; iboe, Soen Nio, lantaran terlaloe lema soeda tiada dapet perinda'an dari orang-orang di dalem roema. Hok Tjoen soeda tiroe ajah poenja soerat dan dengen paksa minta akoe kawin padanja, beroentoeng The Koen soeda petjaken itoe resia, hingga dengen begitoe akoe baroe mendoesin dari itoe perboeatan jang sanget terkoetoek.
Kerna diri bisa djadi tjilaka dari perboeatannja Hok Tjoen, maka kepaksa dengen berpakean lalaki bersama Tjeng Bwe akoe telah melariken diri dari roema sendiri.
Sakean lama akoe terloenta-loenta di kampoeng orang, achir-achir akoe dapet pertoeloengannja Tio Siokhoe dan sakean lamanja akoe menoempang padanja.
Sekarang Tio Siokhoe ada pangkoe djabatan Tikoan di kota Kang Tjioe. Tinggal di sana kira-kira satoe taon lebi lamanja, kamodian akoe dapet kabar di kota
