— 1419 —
Ka doeanja lantas berdoedoek poela.
Tjo Goanswe laloe prenta satoe orang pergi panggil Tjoei Tjeng di loear. Tiada lama itoe Kie-Paij dateng mengadep, seraja menanja maoe di prenta apa.
„Atas kau poenja berbagi-bagi pakerdja'an jang menjenangken,“ kata Tjo Goanswe, „dengen ini akoe kasi selamat tiga tjawan arak.“
Sembari kata begitoe ini kepala prang toeang satoe tjawan arak dan kasiken itoe pada Tjoei Tjeng, jang trima ini pembrian sambil berloetoet; tjawan jang ka doea poen soeda di bikin kering, sedeng sampe pada katiga kalinja, sambil angsoerken itoe Tjo Goanswe berkata: Ini 3 tjawan arak ada boeat keslametannja kau poenja diri; akoe hatoerken trima kasi atas kau poenja pertoeloengan jang soeda mengoendjoek dalem tempo jang begitoe penting.“
Tjoei Tjeng membilang trima kasi, tapi ia tiada mengarti apa sebabnja itoe kapala prang bilang begitoe. The Sioe-pi sigra terangken itoe semoea dan ia minta soepaja hal itoe djangan di seboetken lagi, kerna kwatir laen orang dapet denger dan boleh menerbitken tjerita jang tiada enak.
Begitoelah sateroesnja dalem itoe perdjamoean ia orang membitjaraken banjak oeroesan, jang lantaran tiada perloe, baeklah tiada oesah menjeritaken satoe apa.
