— 1424 —
mendapet sedikit oepa, samentara Kwe Si poen toeroet berkoeli, mendjait dan laen pakerdja'an prampoean.
Dalem itoe pengidoepan ketjil, boekan sadja ia orang tiada bisa bikin plesir makan minoem seperti jang soeda-soeda, dapet makan sadja soeda moesti di bilang sanget bagoes.
Brapa boelan lamanja ia orang idoep dengen sanget soeker.
Mendadak itoe waktoe di dalem kota telah terbit kariboetan, jang mana di atas ini kita soeda toetoerken satoe persatoe tentang itoe hoeroe-hara di Djin Ho Koan, jang soeda mengambil korban begitoe besar, sampe pembesar negri kena di binasaken. Ini doea menoesia keparat merasa sanget ketakoetan; terlebi poela koetika liat laen- laen pendoedoek negri semoea soeda melariken diri ka laen tempat. la mengarti, kaloe itoe tempo tiada tjepet berlaloe, nistjaja djiwanja aken mendjadi korban sendjatanja kaoem peroesoe.
Kwe Si laloe berdami sama Tjo Mama, ka mana ia orang moesti melarikan diri.
„Akoe rasa paling baek kita orang melariken diri ka kota Tjap Liang (kota radja), di sana akoe ada poenja adé lelaki jang bekerdja sebagi penoenggoe pintoe di astana radja,“ kata Tjo Mama.
„Kaloe begitoe kabetoelan sekali,“ kata Kwe Si,akoe poenja 'ntjim djoega ada di sana; doeloean
