— 1425 —
ia kerdja dalem gedongnja orang hartawan familie radja, tapi kamodian lantaran radjin dan mengarti pakerdja'an, ia diambil oleh permisoeri dan bekerdja djadi toekang masak.“
Sebab doea-doea ada mempoenjai satoe maksoed, ini doea orang laloe tetepken niatannja aken brangkat ka kota radja. Marika lantas boentel pakeannja, toeroet orang banjak pergi melariken diri ka loear kota.
Koetika sampe esok paginja, itoe doea orang soeda terpisa djaoe dari Djin Ho Koan, ia orang berdjalan teroes dengen tjepet sekali. Betoel di waktoe tengari ia orang sampe di satoe boelakan, di mana tjoema ada bebrapa poehoen sadja jang terletak di pinggir djalan.
Di bawa poehoen itoe sanget tedoe, lagi terang, kerna tempat itoe memang di goenaken sebagi tempat brenti oleh orang-orang pedagang jang maoe pergi dan poelang dari Djin Ho Koan.
Kwe Si dan Tjo Mama merasa sanget lela, maka itoe doea orang tantas brenti mengaso di sitoe,
Tiada lama dari satoe djoeroesan ada mendatengin satoe prempoean toea, tangannja menengteng boengkoesan. Itoe orang djalan dengen tjepet sekali dan sabentar-bentar menengok; kaloe diliat kelakoeannja bisalah didoega tentoe ada sala satoe pendoedoek di Djin Ho jang telah melarikan diri.
