— 1442 —
dak pergi ka kota radja akan tengok ia poenja
familie," saoet itoe anak praoe. „Koetika maoe
brangkat dari pelaboean Djin Ho Koan, akoe
poenja njonja dapet liat itoe tiga orang prempoean, jang katanja dengen djalan kaki hendak
pergi ka kota radja. Akoe poenja njonja kasian
padanja, maka laloe disilaken naek ka praoe
dengen tiada oesa membajar sewa, tapi tiada
njana ia terbitken ini perboeatan boesoek, beroentoeng Tjiangkoen dapet taoe, kaloe tiada
tentoe kita orang jang aken mendapet tjilaka."
Sasoedanja dapet itoe ketrangan, An Gin sigra berpaling pada itoe doea orang dan menanja, nama apa, asal dari mana, serta sebab begimana. maka ia soeda keniaja itoe njonja begitoe roepa?"
„Akoe saorang she Tjo, pegang pakerdja'an Tjengkauw di Djin Ho," saoet Tjo Mama. Kamodian ia mengoendjoek pada Kwe Si dan berkata lagi: Ini njonja saorang she Kwe, istrinja Kou Han Lim, djoega tinggal di sana. Kita orang masing-masing maoe melariken diri ka kota radja, kerna di kota tempat kita orang. tinggal ada terbit kariboetan besar."
„Itoe orang jang kau tjemploengken ka dalem kali siapa?" tanja An Gin.
„Itoe orang di panggil Ong Ma, pakerdja'annja boeka satoe roema plesiran di Djin Ho Koan," saoet Tjo Mama, jang sembari oetjapken itoe
