— 1472 —
Kamodian Bong Loan panggil Tjio Hoaij Giok, prenta ini panglima mengepalaken tiga riboe soldadoe djalan kaki dan di pesen, ini panglima dan tentaranja tiada perloe berprang dengen mati-matian, hanja perloenja tjoema boeat reboet moesoe poenja alat sendjata dan laen-laen jang perloe dalem peprangan. Tjeng Bwe di prenta oeroes pengangkoetan ramsoem.
Sasoedanja itoe sekalian panglima berlaloe, Bong Loan sendiri laloe komendir bebrapa riboe soldadoenja bersama kira-kira sepoeloe panglima prang, dengen ambil djalanan ketjil troes menoedjoe ka djoeroesan soengei Hek Ho.
Peprangan jang terdjadi ini sekali tiada perloe aken kita oelangin kombali di sini, kerna soeda kedjadian seperti jang soeda, jaitoe; Ouw-jan Peng, The Tok, Beng Jang dan Tjiauw Eng telah kala dan kasiken gerobak-gerobaknja di reboet oleh moesoe.
Sabegitoe lama pembatja belon mendapet taoe dengen maksoed apa Bong Loan prenta madjoeken itoe grobak-grobak.prang dan kasi di rampas oleh moesoe, maka baeklah di sini kita terangken begimana keada'annja jang bener.
Di atas ini pembatja soeda saksiken, bahoea itoe gerobak-gerobak jang soeda kena di rampas oleh tentara Pak Hoan bermoela ada di'isiken kertas kertas sadja, hingga kasoeda'annja itoe semoea telah di djadiken korbannja api.
