— 1476 —
Tjeng Bwe masoek lebi doeloe, tapi tiada lama ia kaloear kombali dan berkata pada itoe sekalian panglima: „Goanswe soeda doedoek bersidang di dalem pasanggrahan, angkau sekalian di panggil masoek ka dalem.“
Itoe sekalian panglima lantas masoek, masing-masing lantas berloetoet, ia orang kaliatan ada begitoe menaro inda pada itoe kapala prang, jang ia orang baroe dapet kenjata'an, kepandeannja dalem oeroesan prang ada sebagi melaekat jang mendjelema.
„Tjiongwie Tjiangkoen soeda diriken itoe pahala besar, boeat mana akoe aken masoekin namanja ka dalem boekoe dan nanti aken trima gandjaran besar,“ kata Bong Loan pada marika itoe, „tjoema akoe menjesel The Tok waktoe hendak brangkat ka medan prang soeda oetjapken perkata'an-perkata'an jang tiada enak, hingga lantaran ia poenja tjara jang begitoe roepa boekan sedikit soeda bikin ilang balatentara poenja kagoembira'an aken bikin penjerangan pada moesoe.“
The Tok sambil berloetoet manggoetin kapalanja beroelang-oelang, ini ponggawa trima sala, minta di bebasken dari kadosa'annja.
Bermoela Bong Loan hendak djatoken hoekoeman atas dirinja itoe ponggawa, tapi beroentoeng kawan-kawannja jang laen telah mintaken ampoen,
