— 1477 —
dengen begitoe ia diloepoetken dari hoekoeman katjoeali dibikin ketjil dari ia poenja gandjaran jang haroes di dapet.
„Sekarang angkau sekalian boleh berdahar, kamodian balik poela ka mari,“ Bong Loan membri prenta pada marika itoe.
Marika lantas moendoer.
Sesampenja di loear, Ouw-jan Peng berkata pada kawan-kawannja: “Begimana dengen kau poenja pengliatan sekarang? Apa tiada haroes di seboet, bahoea kita poenja Goanswe ada melaekat jang mendjelema?”
„Sasoenggoenja haroes diseboet begitoe!“ kata The Tok sambil gojang kapalanja. „Akoe bermoela tjoema doega sadja ia poenja prentahan tiada membawa arti apa-apa, tapi sekarang.........ja, akoe tiada bisa bilang laen, selaennja ia itoe ada panglima jang toeroen dari atas langit!“
„Pada waktoe hendak brangkat akoe poen soeda bilang, roepanja kita poenja kapala prang ada laen sekali seperti pada bebrapa hari jang laloe,“ kata Ouw-jan Peng, „akoe dapet kenjata'an, dalem ia poenja perkata'an-perkata'an waktoe membri prenta ada berati begitoe dalem, hingga membikin akoe timboel doega'an, berhoeboeng dengen itoe tentoe djoega ada menjelip tipoe apa-apa jang bisa membri kamenangan dalem itoe peprangan. Njatalah akoe poenja doega'an sasoenggoenja tiada meleset!“
