— 1482 —
gaga serta pande dalem ilmoe prang; kaloe sekarang, dengen zonder pikir lagi kita menjerang padanja, akoe rasa gampang sekali kena di djebak olehnja. Maka dari itoe, hareplah Taij Tjoe soeka berlakoe sedikit sabar, soepaja kita poenja kerdja'an tiada berbalik mendjadi tjilaka.“
„Djika toeroetin Sinsing poenja maoe, sampe kapan akoe bisa tantjep kaki di daera Tiong Goan?“ kata Prins dengen roepa koerang mengarti. „Tida, akoe tiada moesti berlakoe lambat, satoe pembalesan heibat moesti lantas di siapken.“
Laen-laen panglima tjoba menjega kahendaknja itoe poetra radja, tapi itoe semoea pertjoema sadja, kerna ia poenja niat ada begitoe keras dan tiada bisa di roba poela.
„Bila Sinsing dan laen-laen merasa kaberatan boeat toeroet dalem barisankoe sekarang, biarlah akoe bersama Koensoe brangkat lebi doeloe,“ kata lagi Prins Ya Loet, „sedeng Sinsing kaloe soeda dapet pikir apa-apa jang bisa membri kaberoentoengan, akoe silaken lantas menjoesoel akoe di sana.“
Sekalian ponggawa denger begitoe djadi merasa sangsi, maka achir-achir marika itoe kepaksa toeroet kahendaknja itoe Prins bersama madjoeken barisannja, sedeng di pasanggrahannja tjoema di taro bebrapa panglima prang dan kira-kira lima atawa anem ratoes soldadoe boeat mendjaga.
