— 1132 —
ia blon ada poenja persedia'an. Menginget begitoe Boen Pa djadi semingkin doeka dan ingin lantas bersajap, soepaja dengen tjepet ia terbang ka tempat jang maoe dipergiken.
Pada satoe hari ia telah sampe di pasar An Tin. Kombali di sini Boen Pa poenja kasoekeran telah tertindi dengen berbagi-bagi tjerita jang tiada enak. Ja denger pendoedoek di itoe tempat sedeng riboetin wafatnja Haij Kong, Tjong Tin di Gan Boen Koan, dan orang jang ganti kadoedoekannja itoe pembesar almarhoem di kota terseboet.
Sasoenggoenja ini tjerita jang tersiar membikin sanget tiada enak bagi hatinja Tjo Kongtjoe jang memang sedeng berdoeka. Djika Haij Kong soeda . Menoetoep mata dan kadoedoekannja soeda laen orang gantiken, ia rasa brangkali In Liong djoega soeda dapet taoe dan tiada pergi ka sana, hingga sekarang satoe pertanjaän ada menanja katanja: „Di mana adanja itoe orang moeda jang ia lagi tjari? Semingkin di inget hal ini semingkin doeka, sampe achir-achir ia tiada bisa berboeat laen dari pada menangis tersedoe-sedoe.
Tatkala itoe mata hari soeda sampe sore, maka ia berdjalan lebi tjepet boeat sampe di satoe tempat di mana ia boleh tjari roema penginepan. Blon brapa djaoe ia berdjalan, di depan ada mendatengin satoe orang lagi tarik grobak. Itoe grobak
