— 1486 —
tetep di dalem tempoeran, djangan maen tjoerang! Akoe nanti ladenin pada kau sampe sala satoe ada jang mati!“
Dengen itoe perkata'an ia lantas menerdjang, tapi seperti tadi, baroe sadja berprang bebrapa djoeroesan itoe moesoe jang litjik soeda tinggalken kombali padanja.
„Itoelah boekan kelakoeannja satoe laki-laki, andjing!“ treak Prins Ya Loet sembari kertak giginja. Ia sigra prenta tentaranja madjoe lebi djaoe dengen tiada perdoeliken pada itoe moesoe jang sipat koeping.
Berdjalan belon brapa djaoe, kombali di blakang ada kadengeran swara riboet, samentara satoe panglima dateng mengasi taoe, doea pasoekan moesoe menerdjang dari blakang. Ya Loet Sioe San di kotjok tjara begitoe merasa dadanja seperti maoe petja; ia lantas roba barisannja, pasoekan depan di bikin djadi barisan blakang, sedeng jang di depan djato ka blakang, soepaja dengen berlakoe begitoe bisa berlakoe lebi tjepet aken menangkis penjerangannja moesoe.
Tatkala ia madjoeken koedanja ia djadi kaget, kerna itoe barisan jang sekarang menjerang, jalah ada pasoekan prang tadi jang telah melariken diri.
Liatlah!“ kata itoe Prins pada sekalian panglimanja. „Angkau sekalian haroes berati-ati, kita poenja moesoe roepa-roepanja pande sekali dalem perkara menjaroe!“
