— 1488 —
Tiada lama ka doea barisan itoe soeda saling, berhadepan satoe sama laen. Tjeng Bwe madjoe ka depan sambil poeter sepasang roejoengnja, moeloetnja bertreak-treak sambil menangtang pada moesoe. Satoe panglima dari fihak Pak Hoan dengen pegang kampak besar lantas kaloear menerdjang, dan ka doea orang itoe sigra bertaroeng dengen seroe sekali.
Koetika berperang sepoeloe djoeroesan, itoe panglima Hoan Kok kepaksa moesti oendoerken dari, kerna ia poenja bagian poendak sebla kanan kena di poekoel oleh roejoengnja Tjeng Bwe, hingga itoe orang jang latjoer tiada mampoe melawan lagi.
Meliat begitoe Ang Kokkioe djadi mara sekali, dengen satoe treakan keras ia geprak koedanja madjoe ka depan.
„Hei, Song Tjiang!“ kata ia. „Bapamoe poenja golok soeda lama tiada mandi dara, mari kita orang berklai sampe tiga ratoes djoeroes!“
Bong Loan lantas treakin Tjeng Bwe dan prenta ia masoek ka dalem barisan. Berbareng dengen itoe, dari kiri kanan kaloear doea panglima negri, jang dengen tiada berkata-kata lagi lantas menjerang pada Ang Kokkioe.
Pertempoeran itoe ada heibat sekali. Maski djoega di keroeboetin doea, sedikit djoega Ang Kit Lek Haij tiada djadi keder, malah ia mener-
