— 1490 —
di toeroet djoega oleh itoe doea panglima jang bertanding sama Ang Kokkioe.
Ya Loet Sioe San bri tanda pada tentaranja aken kedjer pada moesoe jang melariken diri.
Barisan negri kliatan kaloet sekali; Bong Loan sendiri bersama barisannja lari ka djoeroesan Barat, sedeng jang laen-laen melariken diri ka djoeroesan Selatan, samentara beberapa ratoes tentara jang djalan kaki lari terpoeter-poeter dan tiada ketaoean djoeroesan mana jang di toedjoeken.
Prins Ya Loet mengedjer pada Bong Loan dengen keras sekali, pengedjeran mana di lakoeken teroes sampe di kaki boekit Siang Ko Nia. Di sana Bong Loan dan barisannja naek di boekit terseboet, jang mana di toeroet djoega oleh itoe tentara jang mengoedak.
Sakoenjoeng koenjoeng kadengeran swara meriam.
Berbareng dengen itoe, dari sebla Timoer Beng Jang, dari sebla Selatan Ouw jan Peng, dari sebla Oetara Tjiauw Eng, bersama bebrapa panglima laen, terpetja djadi delapan barisan, dengen berbareng lantas dateng menerdjang, koeroeng Ya Loet Sioe San dan sekalian panglimanja di tenga-tenga.
Sekarang marika itoe mengarti, bahoea dirinja soeda kena terdjebak ka dalem tipoenja moesoe.
