— 1493 —
pengrasahan sedi bagi siapa jang mendenger.
Sekarang Bong Loan dapet saksiken dengen keada'annja marika itoe, hingga hatinja itoe kapala prang merasa girang sekali.
„Ini ada koetika jang baek boeat tangkep pada marika itoe!“ kata ia pada sekalian ponggawanja.
Sigra ia kibarken bendera pertanda'an, di waktoe mana Ouw-jan Peng dan sekalian panglima satoe persatoe madjoe menerdjang aken tangkep pada moesoe, sedeng Bong Loan dan Tjeng Bwe djoega toeroen dari atas boekit bantoe tangkep pada marika itoe.
Ang Kokkioe atoer sasisa tentaranja djadi ampat moeka aken menangkis itoe penjerangan, sedeng Prins Ya Loet dengen sendiran telah tjoba boeka satoe djalan dara aken lepasken sekalian kawannja dari itoe kepoengan.
Lakoenjan Prins Ya Loet soeda djadi seperti kerbo gila, ia menoebroek ka kiri dan ka kanan dengen tjara jang memboeta. Sasoedanja menerdjang sakoetika lamanja tapi pertjoema sadja, achir-achirnja ia dapet liat pada Bong Loan, jang lagi membagi prenta pada tentaranja aken menjerang ka sebla depan.
„Kaloe sadja akoe bisa dapet binasaken itoe satoe ponggawa, boeat bisa lolosken diri dari ini kepoengan tiada terlaloe soesa,“ kata Prins Ya Loet Sioe San sembari memandang pada Bong Loan dengen hati merasa gergetan.
