— 1495 —
pikiran laen dan laloe masoekin poela itoe gegaman. Ia pikir, kaloe Ya Loet Sioe San dibikin mati, Pak An Ong tentoe sanget bersakit hati dan sekalipoen dapet di bikin taloek, satoe tempo ia aken beroba pikiran aken bales sakit hatinja ia poenja anak, hingga kamodian hari nistjaja bakal terbit peprangan lagi antara itoe ka doea negri.
Dari sebab dapet pikiran begitoe, Bong Loan ambil poetoesan boeat tangkep idoep pada moesoenja, agar peprangan itoe berachir dengen menjenangken pada fihak jang kala. Satelah tetep dengen itoe pikiran, ini djago prampoean lariken koedanja ka sebla depan, sedeng Prins mengedjer teroes dengen keras sekali.
„Bangsat, apa di negrimoe poenja tjara berprang ada begini matjem!“ treak Ya Loet Sioe San. „Kaloe taoe diri sendiri pengetjoet dan tiada ada poenja kepandean, boeat apa madjoe di medan prang? Akoe kira orang tiada nanti hatoerken poedjian, atas tjaranja kau berprang maen lari-larian!“
Bong Loan biloekin koedanja. Ia menoeding dengen toembaknja seraja berkata: „Kau sampe begitoe menghina padakoe, apatah soeda tentoe akoe tiada bisa menangken padamoe!“
Sembari kata begitoe ia poeter toembaknja dateng menerdjang, di mana ka doea orang itoe lantas bertanding.
