— 1499 —
tjaja, bahoea akoe tiada sekali bitjara djoesta!“ kata Bong Loan sambil tersenjoem dan tolak Prins masoek ka dalem, tapi ia itoe membanta dan tinggal berdiri di depan barisan.
Ang Kokkioe dan laen-laen panglima djadi kamekmek meliat itoe semoea, marika itoe satoe persatoe tinggal bengong sadja dan tiada taoe begimana moesti berboeat.
„Sekarang begimana?“ menanja Bong Loan pada marika itoe. „Akoe liat, peprangan ini soeda mengambil korban begitoe banjak djiwa, dan itoe semoea terbit dan lantaran kakliroeannja kau poenja radja jang berhati temaha, serta ingin tantjep kakinja di daera Tiong Goan. Akoe bilang padamoe, boeat bisa petjaken itoe negri besar, inilah boekan satoe perkara jang gampang di kerdjaken; akoe poenja radja ada saorang jang adil, kasian pada rahajat negri, hargaken orang-orang gaga dan pinter, maka boeat lindoengken hak miliknja Keizer, marika itoe tiada sajang mengorbanken djiwanja sendiri. Sekarang kau poenja Tjoekong soeda kena ditangkep. akoe rasa baeklah menaloek sadja, dengen begitoe ini peprangan djadi brenti dan tiada mengambil korban lebi banjak lagi!“
„Kokkioe, ingetlah!“ berseroe Prins dengen sanget mara. „Pegang betoel-betoel kita orang Oetara poenja deradjat, djangan sembarangan
