— 1502 —
Ang Kokkioe liat begitoe djadi sanget mara
ia madjoeken koedanja dan menerdjang pada Bong
Loan dengen ia poenja golok besar.
Beroentoeng Bong Loan ada poenja sendjata Liong Bwe Koen, dengen sendjata mana ia soeda bisa moendoerken Ang Kit Lek Haij lantaran satoe loeka besar di bagian poendaknja.
Niauw Lim Hie liat Ang Kokkioe lari hatinja djadi keder, maka ia poen lantas toeroet sipat koeping sasoedanja berprang sepoeloe djoeroesan lebi.
Tentara Song lantas maoe mengedjer, tapi Bong Loan kasi denger pertanda'an dan prenta marika berkoempoel kombali.
Tiada lama, Beng Jang, Tjiauw Eng, Ouw-jan Peng dan The Tok bersama barisannja djoega telah sampe di itoe tempat, maka Bong Loan lantas rangkep itoe bebrapa pasoekan djadi satoe, dan teroes poelang ka kota Gan Boen Koan.
Tjio Tjong Tien lebi siang soeda atoer dan bikin penjamboetan pada itoe kapala prang jang soeda beroleh kamenangan besar, marika itoe lantas masoek ka dalem kota.
Prins Ya Loet Sioe San, bersama bebrapa panglimanja jang kena ditangkep lantas dikasi masoek ka dalem pendjara, Bong Loan minta pada Tjio Tjong Tien, soepaja itoe orang-orang tawanan dirawat baek, dan djangan di perlakoeken kasar.
