— 1503 —
Antara laen-laen, dapet djoega dirampas banjak alat prang kapoenja'annja moesoe, barang-barang mana sigra dikasi masoek ka dalem goedang negri di itoe kota.
Bong Loan sigra doedoek bersidang dalem satoe kantoran, di mana telah di hadlirken oleh semoea panglima prangnja. Ini kapala prang telah hatoerken poedjian atas marika itoe poenja bantoean dalem peprangan, dan namanja satee persatoe di masoekin ka dalem boekoe-gandjaran.
„Sekarang akoe dapet kenjata'an, bahoea angkau sekalian telah bekerdja dengen tjara jang paling soenggoe, hingga soeda berachir dengen ini kamenangan besar," kata Bong Loan pada marika itoe.
,,Tapi itoe semoea haroes dibilang ada Goanswe sendiri poenja kamoedjidjatan dalem perkara mengatoer daja oepaja," kata itoe sekalian panglima prang, hingga dengen tiada kaloear banjak tenaga soeda dapet membinasaken bilang riboe soldadoe moesoe dan dapet tangkep bebrapa blas panglima prangnja."
Tjio Tjong Tien djoega njataken banjak poedjian dan merasa sanget gegetoen atas kepandeannja itoe panglima prang moeda dalem oeroesan prang.
Kamodian telah dibikin satoe pesta basar, di
