— 1512 —
poen doea antaranja ada panglima negri djoega tapi tiada oeroeng soeda tiada terloepoet dari penggleda'an ini dan itoe.
Sasoedanja di preksa dan sasoeda djóega dapet sapotong soerat, dari sala satoe panglima jang mendjadi kapala di itoe barisan, baroelah itoe ampat orang bisa dapet masoek ka dalem kota.
Di sini kombali itoe doea panglima asing dapet pemandangan dari atoer-atoeran pendjaga'an dalem kota jang sanget mengagoemken. Pada pintoe pertama ia-orang masoek, di sitoe ada di djaga doea barisan di kiri dan kanan, barisan mana rata pegang sendjata toembak, badjoenja serba idjo, tiada djaoe dari sitoe ada satoe post, di mana ada di djaga oleh satoe kapala prang jang mengepalaken itoe doea barisan.
Pintoe jang ka doea begitoe djoega, tjoema bedanja ia poenja sendjata dan pakean, ja-itoe kampak dan pakeannja serba mera.
Pada pintoe jang ka tiga, adalah terliat satoe pendjaga'an jang lebi baek dari pada doea pintoe jang laen; di sitoe djoemblanja balatentara ada lebi banjak, tjampoer adoek, tapi keada'annja ada lebi rapi dari bagian jang laen-laen.
Di sitoe ada di tempatken alat prang, ramsoem dan laen-laen kaperloean.
Sepandjang meliwatken itoe pintoe-pintoe, doea ponggawa asing itoe selaloe toendoekin kapalanja.
Ko Teng Tjan
96
