— 1557 —
―„ Belon tentoe. Djikaloe hatikoe senang akoe menginep di sana, sedeng kaloe sebaliknja akoe nanti balik poela ka mari."
―„ Tapi sebole-bole akoe minta kau tjepet balik poela kamari. Oeroesan jang kau seraken dalem tangan akoe ada sanget besar, lagi akoe sendirian sadja."
„Ja, liat sadja begimana baeknja," seabis kata begitoe Bong Loan lantas berlaloe.
„Slamet bertemoe!" berseroe Tjeng Bwe. Beng Loan berdjalan teroes.
Sasoedanja itoe gadis djalan sedikit djaoe, dengen berindap-indap Tjeng Bwe mengikoetin dari blakang.
Sabentar poela Bong Loan soeda sampe di itoe kamar, di mana pintoenja, belon tertoetoep. Ia berdiri lama di sitoe, tapi kamodian ia mengetok pintoe.
„Masoek!" begitoe ka dengeran satoe swara merdoe dari sebla dalem.
Bong Loan sigra tolak daonnja dan masoek ka dalem. Ia liat itoe poetri dari Hoan Kok lagi doedoek terpekoer mengadepin satoe lampoe. Ia ada berpakean badjoe soetra berwarna idjo moeda, kapalanja ada pake kopia mas, di atas mana ada tertjantjep doea boeloe boeroeng, sedeng di lehernja ada di slendangken koelit boeloe rase jang bagoes.
