— 1558 —
Moekanja jang poeti dan boender, idoengnja bangir, ada di ramei dengen matanja jang tjeli dan bibirnja jang berwarna mera tjabe; tangannja jang montok ada di pakeken glang-glang mas dan boeatannja bagoes.
Dengen meliat itoe semoea pemandangan, adalah tertampak roepanja satoe gadis jang begitoe eilok, hingga tiada beda sebagi bidadari jang baroe toeroen dari atas kajangan. Bong Loan meliat itoe semoea dalem hatinja memoedji-moedji.
Satoe gadis jang begini eilok parasnja soenggoe akoe baroe taoe liat," begitoelah Bong Loan berkata-kata dalem hatinja.
Koenjoeng-koenjoeng ia dapet inget pada Kou Kongtjoe.
,,Sajang sekali sampe di ini waktoe akoe tiada dapet taoe Kou In Liong ada di mana," demikian itoe gadis berkata poela, „tjoba kaloe ia orang ada di sini, dengen soeka hati akoe poen soeka perseraken ini poetri dari Pak Hoan boeat ia poenja istri jang ka tiga."
Sasoeda berkata-kata begitoe Bong Loan lantas madjoe menghamperi, ia bongkokin selakoe membri hormat.
In Liong liat begitoe boeroe-boeroe berbangkit, dengen perkata'an merdoe ia silaken, orang berdoedoek.
