— 1561 —
„Kamodian Goanswe aken mendapet taoe siapa adanja akoe ini. Tapi sabarlah, kerna pembitjara'ankoe belon sampe diachirnja,“ kata In Liong lebi djaoe. „Dari permoela kali memang akoe soeda menjaroe begini roepa, kerna tjoema dengen begini sadja dirikoe nanti terlindoeng dari tangkepannja orang politie. Akoe diam di Pak Hoan dengen menanggoeng banjak kakeselan; ka satoe akoe ingin lantas poelang ka negri sendiri, ka doea akoe ingin lantas bertemue pada sobat-sobatkoe, jang soeda membela padakoe dan lantaran terbit satoe halangan satoe sama laen soeda berpisa'an. Sekarang kabetoelan Goanswe ada orang dari Tiong Goan, maka akoe soeda minta idjin pada Baginda Pak An Ong aken dateng di sini, dan akoe maoe poelang bersama-sama ka sana.“
Bong Loan denger itoe pembitjara'an hatinja djadi semingkin tjoeriga.
„Sekarang akoe hendak menanja dan djawablah dengen satoe kepastian," kata ia,,siapatah angkau ini? Lelaki atawa prempoean?“
„Akoe orang lelaki....................“
Sedeng In Liong kata begitoe, Bong Loan kaloearken satoe treakan dan sigra moendoer bebrapa tindak. In Liong djadi merasa heran liat kelakoeannja itoe kapala prang, ia tiada abis mengarti kenapa mendadak ia kaliatan djadi takoet.
