— 1562 —
Sekarang itoe doea orang saling maen liat-liatan satoe sama laen. Teroetama Bong Loan kaliatan djadi bingoeng.
Tjeng Bwe jang diam diam ada mengintip dari djendela, dengen njata telah menjaksiken itoe semoea.
„Goanswe tentoe soeda mengarti baek dengen akoe poenja penoetoeran,“ begitoe kamodian In Liong menerangken. „Tadi akoe bilang, harep Goanswe tiada djadi menjesel, dan inilah artinja akoe poenja pembitjara'an.“
Bong Loan tiada menjaoet, tapi moekanja jang bersinar mera dan matanja djadi beringas, menjataken itoe gadis timboel maranja.
Memang gadis itoe soeda djadi mara.
Ia merasa dirinja soeda di perhinaken oleh Pak An Ong, dan doega hal itoe soeda di atoer terlebi doeloe.
In Liong dapet liat itoe semoea, maka ia boeroe-boeroe bangoen dari tempat doedoeknja dan berloetoet di hadepannja Bong Loan.
„Dalem ini perkara betoel akoe dan Pak An Ong ada berdosa, tapi dengen pengharepan besar Goanswe soeka membri ma'af,“ kata ia, „lagi kita orang ada berasal dari satoe kampoeng, maka sasoenggoenja tega sekali kaloe Goanswe mara padakoe, jang begitoe ingin bisa terlepas dari itoe berbagi-bagi kasoesahan.
