— 1597 —
„Sebagimana akoe bilang, itoe njonja boekan saorang jang beroentoeng," saoet Tjhia Si. „Sedari berbesan sama familie Bauw, akoe baroe perna liat Ko Taij-Taij dateng di sana ampat kali. Pertama, jaitoe koetika Hok Siangkong menika; ka doea, waktoe Bauw Kong, dan istrinja menoetoep mata; ka tiga koetika Hok Siangkong meninggal doenia; dan ka ampat, jaitoe paling blakang, waktoe di sini ada terbit bahaja bandjir, dalem ketjilaka'an mana telah mengambil korban bilang ratoes djiwa menoesia. Antara itoe bebrapa koendjoengan, adalah koendjoengan jang ka doea dan pengabisan ada paling menjediken bagi siapa jang meliat, kerna brangkali orang baroe perna dapetken, ada satoe mantoe jang begitoe koerang adjar dan kedjem, serta tiada mengindaken pada mertoeanja."
Bong Loan liat begitoe tiada mengarti, maka ia lantas menanja, kaloe-kaloe dalem hal itoe ada kedjadian begimana.
Koendjoengan jang ka doea, jaitoe waktoe Bauw Kong dan istrinja meninggal doenia," kata Tjhia Si lebi djaoe. Menoeroet patoet, sabenernja Bauw Dji Hoa moesti dateng menjamboet dengen pantes pada mertoeanja itoe, tapi ia tiada berboeat begitoe, hanja tinggal diam sadja di dalem kamar tiada maoe kaloear, sedeng waktoe Ko Taij-Taij masoek ka dalem aken pasang
