— 1604 —
kerna kwatir ada moesoe dateng menjerang," kata Tek Lo Ya,„tetapi sekarang haroeslah di bilang kita orang soeda terlepas dari pengrasahan kwatir, kerna Goanswe telah bikin aman itoe semoea, kariboetan di sebla Oetara, hingga boeat kita orang merasa sanget soekoer."
„Itoelah ada pakerdja'an ketjil sadja, tiada tjoekoep aken Lo Ya boeat seboetan," saoet Bong Loan dengen laen-laen perkataän renda.
„Boleh di bilang itoe kariboetan di Pak Hoan soeda bikin orang djadi sanget iboek bila di bandingken dengen itoe hoeroe hara di kota Hang Tjioe," kata Tek Lo Ya lebi djaoe. „Orang banjak soeda mengarti, Pak An Ong ada mempoenjain banjak panglima prang jang gaga dan banjak ilmoenja; koetika doeloean, waktoe di sana ada terbit pembrontakan, Tin Kok Ong jang dapet trima prenta aken bikin beres keadaan di sana, sasoedanja melaloein bebrapa taon lamanja baroe bisa djadi aman, dari mana ada ternjata, itoe moesoe tiada boleh dipandang renda. Tapi roepa-roepanja sekarang soeda djadi laen, atawa haroes diseboet Goanswe ada saorang jang lebi pande dan lebi beroentoeng dari itoe panglima prang jang doeloe, kerna dalem tempo jang begitoe tjepet Goanswe soeda bisa taloekin radja Pak An Ong dan bikin aman kombali keada'an jang koesoet di sana."
