— 1633 —
sambil mengela napas, sebagi satoe penggawe jang tiada mempoenjai laen niatan, selaennja bersetia pada djoengdjoengan sendiri, hambamoe sekali-kali tiada ada poenja pikiran jang begitoe matjem. Apa hambamoe telah trima itoe semoea soeda tachdirnja Allah, satoe peroentoengan jang memang soeda moesti di alamken dalem pengi doepankoe. Djangan poela Baginda bikin begitoe roepa, biarpoen badankoe di tjingtjang antjoer sampe djadi aboe, tiada oeroeng hamba merasa ridla dan senang di hati."
Baginda merasa girang sekali dengen itoe oetjapan, jang kaloear dari moeloetnja satoe pembesar jang bidjaksana. Selandjoetnja Baginda lantas menanjaken bebrapa hal jang kedjadian selama itoe, jang mana Ko Kong telah toetoerken terang dari awal sampe di achirnja.
Sasoedanja beromong-omong banjak, Baginda lantas silaken itoe orang bangsawan moendoer. Terlebi djaoe Baginda lantas prenta sala satoe hambanja ambil Kwe Si dan Tjo Mama di dalem barisannja Tjo Goanswe dan prenta seraken itoe doea menoesia doerhaka dalem tangannja Gie Soe Souw Toan, aken di preksa perkaranja.
Dengen idjinnja Baginda radja, Ko Kong lantas adjak Lee So Nio, Song In, The Koen, Nio Si, Djim Sioe Tji dan jang laen-laen poela poelang ka gedong Tin Kok Hoe, di mana lebi doeloe
